Concilio di Magonza
Concilium Moguntinense · 813 d.C. · Mainz
Can. 36 — De festivitatibus anni
De festivitatibus anni. Festos dies in anno celebrare sancimus, hoc est diem dominicum Paschae cum omni honore et sobrietate venerari, simili modo totam ebdomadam illam observare decrevimus, diem ascensionis Domini pleniter celebrare, in Pentecosten similiter ut in Pascha, in natali apostolorum Petri et Pauli diem unum, nativitatem sancti Iohannis Baptistae, adsumptionem sanctae Mariae, dedicationem sancti Michahelis, natalem sancti Remigii, sancti Martini, sancti Andreae, in natali Domini dies quattuor, octavas Domini, Epiphaniam Domini, purificationem sanctae Mariae et illas festivitates martyrum vel confessorum observare decrevimus, quorum in unaquaque parrochia sancta corpora requiescunt, similiter etiam dedicationem templi.
Can. 37 — De dominicis diebus
De dominicis diebus. Omnes dies dominicos cum omni veneratione observare decrevimus et a servili opere abstinere, et ut mercatus in eis minime sit nec placitum, ubi aliquis ad mortem vel ad poenam iudicetur.