PL 17, col. 1183

Coelo refulgens gratia,
Artus revelavit sacros,
Nequimus esse martyres,
Sed reperimus martyres.
Dic quis requirat testium
Voces, ubi factum est fides:
Sanatus impos mentium
Opus fatetur martyrum.
Caecus recepto lumine
Mortis sacrae meritum probat,
Severus est nomen viro,
Usus minister publici.
Ut martyrum vestem attigit,
Et ora tersit nubila,
Lumen refulsit illico,
Fugitque pulsa caecitas.
Soluta turba vinculis,
Spiris draconum libera,
Emissa totis urbibus
Domum redit cum gratia.
Vetusta saecla vidimus
Jactata semicinctia,
Tactu et umbra corporum
Aegris salutem redditam.
Gloria tibi, Domine.
Gloria Unigenito, etc.
Hymnus tempore Paschali ad Tertiam.

Hic est dies verus Dei,
Sanctus sereno lumine,
Quo diluit sanguis sacer
Probrosa mundi crimina.
Fidem refundens perditis,
Caecosque visu illuminans:
Quem non gravi solvit metu
Latronis absolutio.
Qui praemio mutans crucem
Jesum brevi acquirit fide,
Justusque praevio gradu
Pervenit in regnum Dei.
Opus stupent et angeli,
Poenam videntes corporis,
Christoque adhaerentem reum
Vitam beatam carpere.
Mysterium mirabile,
Ut abluat mundi luem,
Peccata tollit omnium,
Carnis vitia mundans caro.
Quid hoc potest sublimius:
Ut culpa quaerat gratiam