PL 17, col. 1215

Vox namque Verbi, vox sapientiae est,
Major prophetis et minor angelis,
Qui praeparavit corda fidelium
Stravitque rectas justitiae vias.
Assertor aequi non ope regia
Nec morte dura linquere tramitem
Veri coactus: Non licet, ait, tibi
Uxorem habere fratris adulteram.
Hinc ira regis saevaque funera
Saltationis munere vendita,
Mensas tyranni et virginis ebrius
Luxus replevit sanguine sobrio.
Haec vitricus dat dona vesanior
Quam si veneni pocula traderet,
Negare praestat quam dare vitricum,
Odisse praestat, plus nocet horum amor.
Sit Trinitati maxima gloria.
Laus et potestas et sapientia,
Sit fortitudo ac magnificentia
Uni Deo per saecla perennia.
De SS. Petro et Paulo Apostolis.
Apostolorum passio
Diem sacravit saeculis,
Petri triumphum nobilem,
Pauli coronam praeferens.
Conjunxit aequalis viros
Cruor triumphalis necis,
Deum secutos praesulem
Christi coronavit fides.
Primus Petrus apostolus,
Nec Paulus impar gratia,
Electionis vas sacrae
Petri adaequavit fidem.
Verso crucis vestigio
Simon honorem dans Deo
Suspensus ascendit, dati
Non immemor oraculi.
Praecinctus ut dictum est senex
Et elevatus ab altero
Quo nollet ivit, sed volens
Mortem subegit asperam.
Hinc Roma celsum verticem
Devotionis extulit,
Fundata tali sanguine
Et vate tanto nobilis.
Tantae per urbis ambitum
Stipata tendunt agmina,
Trinis celebratur viis
Festum sacrorum martyrum.
Prodire quis mundum putet
Concurrere plebem poli,
Electa gentium caput
Sedes magistri gentium.
De S. Sixto.
Magni palmam certaminis
Invicta fides contulit;
Pro Christo dimicantibus
De coelo datur calculus.
Sic fortis Xystus athleta,
Petri sequens martyrium,
Ornavit mox Ecclesiam
Confessionis titulo.
Ortus Athenis et altus
Philosophorum studiis,
Mutavit artem artium
Praeceptor apostolicus.