PL 22, col. 667

4.
Scriptores Ecclesiastici saecularibus litteris eruditi. --Curram
per singulos: Quadratus Apostolorum
discipulus, et Atheniensis Pontifex Ecclesiae, nonne
Adriano Principi, Eleusinae sacra invisenti, librum
pro nostra religione tradidit? Et tantae admirationi
omnibus fuit, ut persecutionem gravissimam, illius
excellens sedaret ingenium. Aristides Philosophus,
vir eloquentissimus, eidem Principi Apologeticum
pro Christianis obtulit, contextum Philosophorum
sententiis: quem imitatus postea Justinus, et ipse
Philosophus, Antonino Pio et filiis ejus, Senatuique
librum contra Gentiles tradidit, defendens ignominiam
crucis, et resurrectionem Christi tota praedicans
libertate. Quid loquar de Melitone Sardensi Episcopo?
quid de Apollinario Hierapolitanae Ecclesiae
Sacerdote, Dionysioque Corinthiorum Episcopo, et
Tatiano, et Bardesane, et Irenaeo Photini Martyris
successore: qui origines haereseon singularum, et
ex quibus Philosophorum fontibus emanarint, multis
voluminibus explicarunt? Pantaenus Stoicae sectae
Philosophus, ob praecipuae eruditionis gloriam, a
Demetrio Alexandriae Episcopo missus est in Indiam,
ut Christum apud Brachmanas, et illius gentis Philosophos
praedicaret. Clemens Alexandrinae Ecclesiae
Presbyter, meo judicio [(al. vir meo judicio, etc.)] , omnium
eruditissimus, octo scripsit Stromatum libros;
et totidem ὐποτυπώσεων, et alium contra Gentes, Paedagogi
quoque tria volumina. Quid in illis indoctum?
imo 429 quid non de media Philosophia est?
Hunc imitatus Origenes, decem scripsit Stromateas,
Christianorum et Philosophorum inter se sententias
comparans: et omnia nostrae religionis dogmata de
Platone et Aristotele, Numenio, Cornutoque confirmans.
Scripsit et Miltiades contra Gentes volumen
egregium. Hippolytus quoque, et Apollonius, Romanae
urbis Senator, propria opuscula condiderunt.
Exstant et Julii Africani libri, qui temporum scripsit
historias; et Theodori, qui postea Gregorius appelatus
est [(S. Gregorius Thaumaturgus)] , viri Apostolicorum
signorum. atque virtutum; et Dionysii
Alexandrini Episcopi: Anatolii quoque Laodicenae
Ecclesiae Sacerdotis; nec non Presbyterorum Pamphili,
Pierii, Luciani, Malchionis, Eusebii Caesariensis
Episcopi, et Eustathii Antiocheni, et Athanasii
Alexandrini: Eusebii quoque Emiseni, et Triphilii
Cyprii, et Asterii Scythopolitae, et Serapionis Confessoris:
Titi quoque Bostrensis Episcopi: Cappadocumque
Basilii, Gregorii, Amphilochii: qui omnes
in tantum Philosophorum doctrinis atque sententiis
suos resarciunt libros, ut nescias quid in illis primum