AAS 15 (1923), p. 27

LITTERAE APOSTOLICAE

I

PRAEFECTURA APOSTOLICA TERRAE GULIELMI ORIENTALIS IN VICARIATUM APO-

STOLICUM, NOVAE GUINEAE ORIENTALIS DENOM1NANDUM, ERIGITUR,

PIUS PP. XI
Ad perpetuam rei memoriam. — Ineumbentis Nobis Apostolici officii
cura Nos admonet, ut - diffusis per orbem terrarum Ecclesiis attente
continenterque ea provideamus, quae ad felicem earumdem statum ac
regimen conducant, et christifidelium bonum et incrementa in iis longinquioribus
regionibus provehant. Quam ob rem, quum in praefectura
apostolica Terrae Gulielmi Orientalis, quae iam anno MDCCCXCVI Litteris
Apostolicis, die xxin mensis ianuarii datis, in insula Novae Guineae
erecta ac Societatis Verbi Divini Missionariorum curis concredita fuit,
ad hunc usque diem tam notabile evenerit rei catholicae incrementum
ut christifidelium copia in illis regionibus longinquis maior facta sit;
plurimumque expedire noverimus, ad magis magisque catholicam religionem
ibidem stabiliendam, ut Apostolicus Vicarius, episcopali charactere
insignitus, earum regimini praesit, Nos, conlatis consiliis cum VV.FF. NN.
S. R. E. Cardinalibus negotiis S. Congregationis de Propaganda Fide praepositis,
de novo erigendo vicariatu decernere in Domino existimavimus.
Nimirum, motu proprio et ex certa scientia ac matura deliberatione Nostris,
deque Apostolicae Nostrae potestatis plenitudine, praesentium Litterarum
vi, actualem praefecturam apostolicam Terrae Gulielmi orientalis
in apostolicum vicariatum erigimus, iis quidem finibus constitutum, quibus
ipsa praefectura apostolica ad hunc diem constabat, illumque Novae
Guineae Orientalis Vicariatum Apostolicum appellari decernimus.
Haec statuimus, decernentes praesentes Litteras validas et efficaces
semper exstare ac permanere, suosque plenos atque integros effectus
sortiri atque obtinere, illisque ad quos spectant, sive spectare poterunt,
plenissime suffragari nunc et in posterum, sicque rite iudicandum esse
ac definiendum, irritumque atque inane fieri, si quidquam secus super
his, a quovis, auctoritate qualibet, scienter sive ignoranter attentari
contigerit. Non obstantibus constitutionibus et ordinationibus Apostolicis,
ceterisque in contrarium facientibus quibuslibet.
Datum Romae apud Sanctum Petrum, sub anulo Piscatoris, die
XXIII novembris anno MCMXXII, Pontificatus Nostri primo.

P. CARD. GASPARRI, a Secretis Status.