Council of Coyanza

Canon 3 — De jure ecclesiarum, et vestibus clericorum

Tertio autem titulo statuimus, ut omnes ecclesiae et clerici sint sub jure sui episcopi: nec potestatem aliquam habeant super ecclesias aut clericos laici. Ecclesiae autem sint integrae, et non divisae, cum presbyteris et diaconis, et cum totius anni circuli libris, cum ornamentis ecclesiasticis: ita ut non sacrificent cum calice ligneo, vel fictili. Vestes autem presbyteri sint in sacrificio, amictus, alba, cingulum, stola, casula, manipulus. Vestes diaconi, amictus, alba, cingulum, stola, dalmatica, manipulus. Altaris vero ara tota sit lapidea, et ab episcopis consecrata. Hostia sit ex frumento sana et integra. Vinum sit mundum, et aqua munda, ita ut inter vinum, hostiam, et aquam, Trinitas sit significata. Altare sit honeste indutum, et desuper lineum indumentum mundum. Subtus calicem, et desuper, corporale lineum mundum et integrum. Presbyteri vero et diacones, qui ministerio funguntur ecclesiae, arma belli non deferant, semper coronas apertas habeant, barbas radant, mulieres secum in domo non habeant, nisi matrem et sororem, aut amitam, aut novercam. Vestimentum unius coloris, et competens habeant. Intra etiam dextros ecclesiae laici uxorati non habitent, nec jura possideant. Doceant autem clerici filios ecclesiae, et infantes, ut symbolum et orationem dominicam memoriter teneant. Si quis autem laicus, hujus nostrae institutionis violator extiterit, anathema sit: presbyter vero et diaconus, si hujus jussionis destructor extiterit, sexaginta solidos episcopo persolvat, et gradu ecclesiastico careat.