Diocesan Synod of Exeter (Bishop Peter Quivil)

Canon 12 — De ecclesiarum ornamentis, et eorum custodia

[...]te ornamenta ecclesiarum, quibus quasi propriis instrumentis sacramenta ecclesiastica ministrantur, sint fulgida et honesta, exemplum nos docet doctissimi Salomonis, dum vasa domus Dei ex auro purissimo constituit fabricari. Quapropter praecipimus, quod quaelibet parochialis ecclesia, et etiam cappella distinctam habens parochiam, munda et decentia habeat ornamenta. Sit in aliqua ecclesia saltem unus calix argenteus, purus vel deauratus: scyphus argenteus vel stanneus pro infirmis, ut postquam Eucharistiam assumpserint, loturam digitorum suorum sacerdos sibi praebeat in eodem. Sint duo corporalia munda et integra cum repositoriis: duo paria vestimentorum, plenare unum, festivale, aliud feriale: quatuor tuellae ad majus altare, quarum saltem duae sint benedictae, et una illarum cum parura. Item ad quodlibet altare, cum contigerit Missam inibi celebrari, sint superpellicea duo, et unum rochetum: velum quadragesimale: velum nuptiale: palla mortuorum: frontellum ad quodlibet altare: Missale bonum, graduale, troparium, manuale bonum, legenda, antiphonale, psalteria, ordinale, venitare, hymnare, collectare; praesens synodus scripta habeatur in singulis ecclesiis citra festum S. Michaelis: cista ad libros et vestimenta: pyxis argentea vel saltem eburnea ad Eucharistiam cum serura: chrismatorium stanneum cum serura: asser ad pacem: pyxis ad oblatas: tres phialae: sacramentarium lapideum, et immobile: thuribulum: vas ad incensum: vas ad aquam benedictam: herca ad tenebras: candelabrum Paschale: duae cruces, una fixa, et alia portabilis: imago beatae Mariae virginis, et sancti loci ejusdem: cereus paschalis: duo cerei processionales: celatura super altare: campanella deferenda ad infirmos, et ad elevationem corporis Christi: lucerna [...]: campanellae ad mortuos: feretrum mortuorum: baptisterium lapideum bene seratum: fenestrae vitreae sufficientes in cancello et navi ecclesiae. Qualiter haec sunt necessaria in ecclesia Dei ad explendum cultum Divinum, usus nos instituit quotidianus. Quaedam istorum, prout utilitas exposcit in majoribus ecclesiis quae sufficiunt, duplicentur, vel triplicentur, in quibus sint haec amplius quam aliis: diaconus et subdiaconus, cappa chori, tunica, dalmatica, duo phylacteria ad cornu altaris, et unum ad patenam. Onera omnium ornamentorum praedictorum, parochiani, sicut hactenus, ita de cetero supportabunt, libris matutinalibus, unico scilicet psalterio, fenestris vitreis in cancello, et celatura super majus altare, dumtaxat exceptis: quae rectores vel vicarii supportabunt, prout in nostra dioecesi hucusque fieri consuevit. Ornamenta ecclesiae, securae custodiae committantur: non tamen sub custodia laicorum, nisi id necessitas major expostulaverit. Nec [...] sacra contingere, nec in ecclesia loco clerici aliqualiter ministrare praesumant.