Roman Synod of 1059 (Lateran, under Nicholas II)

encyclical Vigilantia universalis

Canon 1

Primo namque, inspectore Deo, est statutum, ut electio Romani pontificis in potestate cardinalium episcoporum sit: ita ut si quis apostolicae sedi sine praemissa concordi et canonica electione eorum, ac deinde sequentium ordinum religiosorum, clericorum et laicorum consensu, inthronizatur, is non papa vel apostolicus, sed apostaticus habeatur.

Canon 2

Ut moriente Romano pontifice, vel cujuscumque civitatis, nullus praesumat facultates eorum invadere, sed successoribus eorum reserventur integrae.

Canon 3

Ut nullus missam audiat presbyteri, quem scit concubinam indubitanter habere, aut subintroductam mulierem. Unde etiam ipsa sancta synodus hoc capitulum sub excommunicatione statuit, dicens: Quicumque sacerdotum, diaconorum, subdiaconorum, post constitutum beatae memoriae praedecessoris nostri sanctissimi papae Leonis de castitate clericorum, concubinam palam duxerit, vel ductam non reliquerit, ex parte omnipotentis Dei, auctoritate beatorum apostolorum Petri et Pauli praecipimus, et omnino contradicimus, ut missam non cantet, neque evangelium vel epistolam ad missam legat, neque in presbyterio ad divina officia cum iis qui praefatae constitutioni obedientes fuerint maneat, neque partem ab ecclesia suscipiat, quousque a nobis sententia super hujusmodi, Deo concedente, procedat.

Canon 4

Et praecipientes statuimus, ut ii praedictorum ordinum, qui eidem praedecessori nostro obedientes, castitatem servaverunt, juxta ecclesias quibus ordinati sunt, sicut oportet religiosos clericos, simul manducent et dormiant: et quidquid eis ab ecclesiis venit, communiter habeant. Et rogantes monemus, ut ad apostolicam, communem scilicet, vitam summopere pervenire studeant.

Canon 5

Deinde, ut decimae et primitiae, seu oblationes vivorum et mortuorum, ecclesiis Dei fideliter reddantur a laicis; et ut in dispositione episcoporum sint. Quas qui retinuerint, a sanctae ecclesiae communione separentur.

Canon 6

Ut per laicos nullo modo quilibet clericus aut presbyter obtineat ecclesiam, nec gratis, nec pretio.

Canon 7

Ut nullus habitum monachi suscipiat, spem aut promissionem habens ut abbas fiat.

Canon 8

Nec aliquis presbyter duas ecclesias simul obtineat.

Canon 9

Ut per simoniacam haeresim nemo ordinetur vel promoveatur ad quodlibet ecclesiasticum officium.

Canon 10

Ut cujuslibet ordinis clericos laici non judicent.

Canon 11

Ut de consanguinitate sua nullus uxorem ducat usque ad generationem septimam, vel quousque parentela cognosci poterit.

Canon 12

Ut nullus laicus ad quemlibet gradum ecclesiasticum repente promoveatur: nisi post mutatum habitum saecularem, diuturna conversatione inter clericos fuerit comprobatus.

decreta addita

Canon 10

De clericis arma ferentibus hoc decernimus, ut quamdiu arma tulerint a proprio gradu decidant.