Synod of Toledo (597)
Concilium Toletanum (anni 597) · AD 597 · Toledo
Canon 1
Priscorum patrum sequentes monita id praecipiunt dei sacerdotes, ut quae sanctae trinitati conveniunt, operibus fidei catholicae in omnibus conjungantur, ita ut sanctam et amicam dei observantes castitatem non solum retinendam pontifices suo corpore censeant, sed et presbyteris et diaconibus ministrantibus dei altaribus modis omnibus observandum constituant, ut ex his qui castitatis voluerit patientiam violare tali sorte coerceatur, ut ultimus a quo est gradu dejectus deo amplius non ministret, sed sacerdotis sui electione sit tali claustro conceptus, ut ceteros suo exemplo corrigat et ille ex poenitentia reviviscat.
Canon 2
Id etiam placuit dei sacerdotibus, ne quisquam antistes infra suam paroeciam dei aulam inquirat et munificus ille qui sanctam dei aedificaverit ecclesiam, quod ibidem pro suo haerede largitus est eodem loco presbyter secundum priorum canonum instituta deserviens habeat. Et si presbyterum ea facultas habere non permittit vel diaconus instituatur. Certe si minor est census, ostiarius a sacerdote sit electus, qui nitorem infra sinus sanctae ecclesiae faciat, qui et sanctarum reliquiarum luminaria omni subsequente nocte accendat.