PL 139, col. 1114

illic remansisse, et per novem annos vices
pontificis administrasse.
4.
Cui opinioni illud nos facile fecit accedere, quia
refertur idem B. Landoaldus, specialem patronum
nostrum, sanctum scilicet Lambertum, prima
pueritia nutrivisse. Propter quod et illustris vir
Aper, ejusdem pueri pater, praedium vocabulo Wintershovum,
super Archa fluvium positum, eidem
ad inhabitandum et ecclesiam construendam perpetuo
jure concessit, et eumdem puerum, divinis dogmatibus
imbuendam, cum eo manere constituit. Ubi
dum artifices operi insistunt, et aquam, utpote de
paludibus turbidam, fastidiunt, B. Landoaldus cum
puero Lamberto, invocato Christi nomine, cum crucis
protensione fontem limpidissimum baculi impressione

omnium usibus fecit ebullire, qui fidem
dictis praebet usque hodie.
5.
Alio itidem tempore cum usui necessario ignis
deesse videretur, accitus a viro sancto puer, ignem
inferre jubetur. Coepit idem imperio reniti, et cur
statim jubenti non satisfecerit, palam fateri: « Vas,
inquit, Domine, quo ignis opportune importetur,
deesse vides, et quo hunc modo inferri jubes?
Promptus quidem tibi obtemperare mihi est animus:
sed ut votis tuis contraire videar, ipse vasis cogit
defectus. » At pius Pater, ubi haesitantis pueri animum
persensit: « Placetne, inquit, fili, paternae jussioni
moram fieri, cum ea qua tegeris veste ignis satis
commode queat inferri? » Qua puer motus increpatione,
cum praeterea obedientiae exemplo cogeretur.

imperio Patris sane optemperat, pauloque progressus,
ignem requirere properat. Quo tandem invento,
nil adesse videns quo eum opportunius ferret,
gremium prunis ardentibus laxat, easque nihil
cunctatus infra collocat, et ita, veste illaesa, ad Patrem
usque deportat. Tunc vir sanctus novitatem miraculi
secum altius considerare, felicisque pueri meritum
perfectorum etiam non dubitat virtutibus comparare:
quo quidem ardens elementum naturam suam vel
ostendere timuit vel omnino coactum est occultare.
At ubi ad populares aures recens adhuc miraculum