PL 95, col. 196

ipsum tempore illo ex eodem est monasterio raptus
de mundo; ex qua nimirum visione multi qui haec
audire potuerunt, ad exorandam in adversis divinam
clementiam, et ad salutaria jejuniorum remedia
subeunda sunt mirabiliter accensi; et ex eo tempore
non solum in eodem monasterio, sed et in plerisque
locis aliis, coepit annuatim ejusdem regis ac
militis Christi natalitius dies missarum celebratione
venerari.
CAPUT XV. Ut Caedualla rex, interfecto rege Geuissorum Aedilualch, provinciam illam saeva caede ac depopulatione attriverit.
Interea superveniens cum exercitu Caedualla,
juvenis strenuissimus de regio genere Geuissorum,

cum exularet a patria sua, interfecit regem Aedilualch,
ac provinciam illam saeva caede ac depopulatione
attrivit [DCLXXXV]; sed mox expulsus est a
ducibus regis, Bercthuno et Andhuno, qui deinceps
regnum provinciae tenuerunt: quorum prior,
postea ab eodem Caedualla, cum esset rex Geuissorum,
occisus est, et provincia graviore [ Al. add. est]
servitio subacta [DCLXXXVI]. Sed et Ini qui [ Al., is qui]
post Caeduallam regnavit, simili provinciam illam
adflictione plurimo annorum tempore mancipavit.
Quare factum est ut toto illo tempore episcopum
proprium habere nequiret [ Al., nequiverit]; sed
revocato domum Uilfrido primo suo antistite, ipsi
episcopo Geuissorum, id est, Occidentalium Saxonum
qui essent in Venta civitate, subjacerent.
CAPUT XVI. Ut Vecta insula Christianos incolas susceperit, cujus regii duo pueri statim post acceptum baptisma sint interempti.
Postquam ergo Caedualla regno potitus est Geuissorum
[DCLXXXVI], cepit et insulam Vectam, quae eatenus
[ Al., hactenus] erat tota idolatriae dedita; tragica
[ Al., stragica] caede omnes indigenas exterminare,
ac suae provinciae homines pro his substituere contendit,
voto se obligans, quamvis necdum [ Al., nondum]
regeneratus, ut ferunt [ Al., ut fertur], in Christo,
quia si cepisset insulam, quartam partem ejus,