PL 147, col. 1223

Marsorum, petimus, munera respice.
Locus aeterni, salus, honor,
Virtus, imperium, lux sine termino,
Rex regum, tibi, Christe, sit,
Et cum Patre Deo, Spiritui sacro. Amen.
III. Item alius hymnus in laudibus ipsius.
Ad Patris decus optimi
Cordis vocibus intimi
Sabinae celebres chori
Laudes pangite martyris.
Coeli scandit ad arduum
Sanctorum vice martyrum.
Et regis sibi Filium
Junxit foedere virginum.
In cujus diademate,
Gemmae more hyacinthinae
Summis pro meritis nitet,
Quae Christi meruit fide.
Coelestis sibi dignitas,
Divo sanguinis indita
Novit solvere praemia
Metae temporis inscia.
Ejus gloria circulos
Semper praeterit annuos,
Quae tanto fit amatior
Est quanto pretiosior.
Mundi deliciae tetrum
Mortis possideant locum,
Cujus supplicii genus
Vitae sit dare praemium.
Ora pro famulis tuis,
Martyr germine nobilis,
Multo nobilior magis
Sacri fenore sanguinis.
Moles dissipa criminis,
Finem posce periculis,
Et mortis febre languidis,
Da munus valetudinis.
Nostris insere mentibus
Christo reddere debitum,
Ne nos fortia judicum
Perdant jura potentium.
Praesta, Conditor optime,
Qui cum Patre Deus manes
Cum sancto quoque Flamine,
Qui regnas sine termine.
Amen.
IV. In sancti Mauri abbatis metrum Sapphicum. Hendecassyllab.
Quid tuo nobis potius placere
In die debet, tibi quam decoris,
Fortius niti precibus, vel hymnis,
Optime Maure?
Tu sacris quondam puer institutis
Maximum vitae studium perennis,
Unde praeclaris rutilas triumphis,
Hic didicisti.