PL 172, col. 1127

suos consolaretur, qui de sua morte tristabantur.
D. Quare in die prima hebdomadae?--M. Ut
mundum ea die renovaret, qua eum creaverat.
D. Cur in tertia die suae passionis?--M. Ut eos,
qui tribus temporibus ante legem, sub lege, et sub
gratia, in peccatis mortui erant, sublevaret, et ut
nos, qui factis, dictis, cogitationibus, labimur, per
fidem sanctae Trinitatis resurgamus.
D. Ubi mansit illis quadraginta diebus?--M. In
paradiso terreno, ut creditur, cum Elia et Enoch, et
cum iis qui cum eo surrexerant.
D. Qualem formam post resurrectionem habuit?--
M. Septies splendidiorem quam sol.
D. Quali forma viderunt eum sui?--M. Tali ut

ante consueverant eum videre.
24. De apparitionibus Christi post resurrectionem.
D. Apparuit eis vestitus?--M. Vestes ex aere assumpserat,
quae, eo ascendente, in aerem evanuerunt.
D. Quoties apparuit?--M. Duodecies. Primo die
octies: Primo, Joseph ab Arimathia in carcere in
quo positus erat eo quod eum sepelierat, ut scripta
Nicodemi declarant. Secundo, Matri suae, ut Sedullus
manifestat. Tertio, Mariae Magdalenae, ut Marcus
asserit. Quarto, duabus mulieribus a sepulcro
revertentibus, ut Matthaeus pandit. Quinto, Jacobo,
ut Paulus testatur, qui se in sexta feria devoverat
non manducaturum donec videret Christum vivum.
Sexto, Petro, ut Lucas narrat, qui propter negationem

ab aliis segregatus in fletibus permanebat. Septimo,
duobus discipulis in via Emmaus, ut idem Lucas
refert. Octavo, omnibus, januis clausis, ut Joannes
describit. Nono, in octavo die, quando eum Thomas
palpavit. Decimo, ad mare Tiberiadis. Undecimo,
in monte Galilaeae. Duodecimo, recumbentibus undecim
discipulis apparuit.
D. Cur dicit Evangelista: Apparuit primo Mariae
Magdalenae? [(Marc. XVI, 9.)]
--M. Evangelia cum
summa auctoritate sunt edita; sed scribere evangelistae
nolebant, nisi ea quae omnibus nota erant, unde
dicitur: Multa et alia fecit Jesus, quae non sunt scripta
in libro hoc [(Joan. XX, 30)]
, id est, in Evangelio.
In aliis autem quaedam, non tamen omnia, inveniuntur;
quae enim fidem excederent, scribere noluerunt.

Unde resuscitationem Lazari, Johanne solo
narrante, caeteri Evangelistae tacuerunt.
D. Num apparuit Dominus ipsa die in Galilaea?--
M. In monte Sion locus vulgo Galilaea vocatur, quia
ibi hospitari solebant qui de Galilaea Hierosolymam
venerant: in hoc et Dominus hospitium habuit,
cum in grandi coenaculo coenavit; in hoc januis
clausis apparuit; in hoc et Spiritum sanctum
misit.
25. De ascensione et sessione Christi ad dexteram Patris: et quomodo ibi oret pro nobis.
D. Ascendit solus?--M. Qui cum eo surrexerunt,
cum eo etiam ascenderunt.