AAS 26 (1934), p. 35

ACTA TRIBUNALIUM

SACRA PAENITENTIARIA APOSTOLICA

(OFFICIUM DE INDULGENTIIS)

I

DUBIUM

Sacrae Paenitentiariae Apostolicae sequens dubium pro opportuna
solutione propositum fuit:
An indulgentiae, invocationibus et precibus sic dictis iaculatoriis
adnexae, acquiri possint, ceteris paribus, a fidelibus quibuslibet etiam
per mentalem tantum earum recitationem?
Et Sacra Paenitentiaria Apostolica die 17 Novembris 1933 respondendum
censuit: Affirmative.
Facta autem de hoc relatione Ssmo D. N. Pio div. Prov. Pp. XI in
audientia habita ab infrascripto Cardinali Paenitentiario Maiori die
1 vertentis mensis, Sanctitas Sua resolutionem approbavit, confirmavit
et publicandam permisit.
Datum Romae, ex aedibus S. Paenitentiariae, die 7 Decembris 1933.

L. Card. LAURI, Paenitentiarius Maior.

L. ® S.

S. Teodori, Secretarius.

II

DECRETUM

INDULGENTIIS DITATUR DIES ROMANO PONTIFICI SACER

Iamdudum in pluribus catholici orbis partibus laudabiliter mos exstat
ut singulis annis, plerumque iuxta anniversarium festum electionis vel
coronationis Summi Pontificis, peculiaris dies statuatur, sive ad solemniter
celebrandas Romani Pontificatus laudes, eiusque innumera beneficia