PL 19, col. 380

At postquam pueris vatis rata commoda sanxit,
Dat Sichimam, gladiumque, suo dat spicula nato.
Clarior ut cunctis sublimem scandat honorem.
CAP. XLIX.
Inde vocat natos, et cunctis praemia dedit,
Bis senasque tribus ipsorum ex nomine condit.
Omnibus explicitis, oculo jam captus utroque,
Pignoribus mansura diu, prolique natorum
Inconcessa prius, longoque adjudicat aevo.
Decessit solo terrenis corpore vates.
CAP. L
Maestitiaeque dedit decies septena dierum
Lumina, dum functi veneratur turba sepulcrum.
Quin etiam nati septem luxere diebus
Uberibus lacrymis, pacem reddente Josepho
Fratribus innocuis, veterem dum negligit iram.
Ipse etiam postquam jam centum triverat annos,
Atque decem, juncti metitus tempore lethi,
Fratribus effatur, venturus qui foret ordo,
Quo revocare gradum valeant, et linquere Nilum.
Dummodo compositos cineres, atque ossa reportent,
Et vehant secum veterum condenda sepulcris.
Sic demum longae post tempora candida vitae
Decessit, petiitque Deum, corpusque reliquit.

Accelerare diem, meritis qui praemia reddat?
Nobilis ingenti testatur gloria facto.
Nam qua stagnanti praelabitur agmine ripas
Tardus Arar, pigrumque Diuvix explicat amnem.